ໃນຕອນເຊົ້າຂອງວັນທີ 3 ມິຖຸນາ 2018 ຄະນະບໍລິຫານງານຊາວໜຸ່ມກະຊວງສາທາະນະສຸກ ໄດ້ຈັດກິດຈະກໍາການບໍລິຈາກເລືອດເພື່ອສະເຫຼີມສະຫຼອງວັນແພດລາວ ( 18 ມິຖຸນາ) ໂດຍມີຄະນະພັກກະຊວງ, ຄະນະບໍລິຫານງານຊາວໜຸ່ມ, ພ້ອມດ້ວຍສະມາຊິກຊາວໜຸ່ມຈາກໜ່ວຍຊາວໜຸ່ວຍອ້ອມຂ້າງກະຊວງສາທາລະນະສຸກເຂົ້າຮ່ວມ. ການສະເຫຼີມສະຫຼອງວັນແພດແມ່ນເປັນການສະແດງຄວາມຮູ້ບູນຄຸນຕໍ່ພະນັກງານແພດໝໍ ແລະ ເປັນການປະກອບສ່ວນໃນພາລະກິດປົກປັກຮັກສາສຸຂະພາບຂອງພໍ່ແມ່ປະຊາຊົນ, ພະນັກງານ, ທະຫານ, ຕໍາຫຼວດ ຕະຫຼອດໄລຍະຕໍ່ສູ້ກູ້ຊາດໃນເມື່ອກ່ອນ ກໍ່ຄືການປົກປັກຮັກສາ ແລະ ສ້າງສາປະເທດຊາດໃນປະຈຸບັນ ເພື່ອໃຫ້ຜູ້ສືບທອດໄດ້ຮໍ່າຮຽນເອົາແບບຢ່າງທີ່ດີ ເປັນແພດໝໍທີ່ມີຄຸນສົມບັດຈັນຍາທໍາທາງດ້ານວິຊາຊີບ, ມີຄວາມຊໍານານດ້ານວິຊາສະເພາະ. ພ້ອມນີ້ຍັງໄດ້ສະແດງໃຫ້ເຫັນການເຕີບໃຫຍ່ຂະຫຍາຍຕົວຂອງຢ່າງບໍ່ຢຸດຢັ້ງຂອງວຽກງານສາທາລະນະສຸກ  ກໍຄືທັນແຖ້ວຂອງພະນັກງານແພດໝໍໃນແຕ່ລະໄລຍະ. ເຊິ່ງໃນໂອກາດນີ້ຊາວໜຸ່ມອ້ອມກະຊວງສາທາລະນະສຸກ ກໍ່ສະໝັກໃຈພ້ອມກັນບໍລິຈາກເລືອດຂອງຕົນເອງເພື່ອຊ່ວຍສັງຄົມ ໂດຍສະເພາະຄົນເຈັບທີ່ເສຍເລືອດຈາກອຸບັດຕິເຫດກໍ່ຄືຜູ້ປ່ວນທີ່ປິ່ນປົວຢູ່ໂຮງໝໍແຫ່ງຕ່າງໆ. ການບໍລິຈາກຄັ້ງນີ້ມີຜູ້ເຂົ້າຮ່ວມຫຼາຍກວ່າ 200 ຄົນ ແລະ ສາມາດບໍລິຈາກເລືອດໄດ້ເຖິງ 129 ຄົນ.