ບົດຂ່າວໂດຍ ສຸກສົມຄວນ ຈັນທະມາດ

ໂດຍການຕອບສະໜອງຕາມການເຊີນຂອງ ອົງການຄຸ້ມຄອງຢາດ້ານຢາ ແລະ ອຸປະກອນກາແພດຂອງປະເທດໂອດສະຕາລີ. ທ່ານຫົວໜ້າກົມອາຫານ ແລະ ຢາ ພ້ອມດ້ວຍຄະນະທິມງານຂອງກົມອາຫານ ແລະ ຢາ ໄດ້ເຂົ້າຮ່ວມພິທີປະກາດໂຄງການສ້າງຄວາມເຂັ້ມແຂງດ້ານການຄຸ້ມຄອງດ້ານຢາ ເຊິ່ງຈັດຂຶ້ນໃນຕອນຄໍາຂອງວັນທີ 3 ຕຸລາ 2018 ທີ່ ສະຖານທູດອົດສະຕາລີ ປະຈໍາ ປະເທດ ສິງກະໂປ. ໃນພິທີປະກາດໂຄງການດັ່ງກ່າວ ໄດ້ມີຜູ້ເຂົ້າຮ່ວມຈາກ ອົງການຄຸ້ມຄອງດ້ານຢາຂອງ 6 ປະເທດ ທີ່ໄດ້ຮັບການຊ່ວຍເຫຼຼືອເຊິ່ງປະກອບມີ: ອິນໂດເນເຊຍ, ກໍາປູເຈຍ, ສປປ ລາວ, ປາປົວນິກິນີ, ມຽນມາ ແລະ ສສ ຫວຽດນາມ.

ໃນວາລະກອງປະຊຸມເປີດໂຕໂຄງການນີ້ ໄດ້ໃຫ້ກຽດເຂົ້າຮ່ວມ່ ແລະ ເປັນປະທານໂດຍທ່ານຮອງເອກອັກຄະລະຖະທູດ ອົດສະຕາລີ ປະຈໍາປະເທດສິງກະໂປ.​ ໃນພິທີປະກາດທ່ານ ທ່ານ ດຣ. ສົມທະວີ ຈາງວິສົມມິດ ຫົວໜ້າກົມອາຫານ ແລະ ຢາ ໄດ້ຂຶ້ນກ່າວຄໍາເຫັນຕາງໜ້າໃຫ້ແກ່ ກະຊວງສາທາລະນະສຸກ ສປປ ລາວ ເຊິ່ງທ່ານໄດ້ສະແດງຄວາມຊົມເຊີຍ ແລະ ຂອບໃຈມາຍັງ ລັດຖະບານອົດສະຕາລີ ໂດຍສະເພາະອົງການຄຸ້ມຄອງດ້ານຢາ ອົດສະຕາລີ (Therapeutic Goods Administration (TGA) ໄດ້ຮ່ວມເຮັດວຽກກັບໜ່ວຍງານທີ່ກ່ຽວຂ້ອງຂອງກົມໃນການກະກຽມການຂຽນແຜນບຸລິມະສິດ ແລະ ກິດຈະກໍາເພື່ອປະກອບເຂົ້າໃນແຜນງານຂອງໂຄງການສ້າງຄວາມເຂັ້ມແຂງດ້ານການຄຸ້ມາຄອງດ້ານຢາ ໂດຍສະເພາະຢາ ມາລາເລຍ ແລະ ຢາປິ່ນປົວພະຍາດວັນນະໂລກ ເຊິ່ງເປັນແຜນງານທີ່ມີຄວາມສໍາຄັນ ປະກອບສ່ວບເຂົ້າໃນແຜນງານປົກປ້ອງຜູ້ບໍລິໂພກອາຫານ ຢາ ແລະ ຜະລິດຕະພັນການແພດ ຂອງກະຊວງສາທາລະນະສຸກ ໂດຍສະເພາະວຽກງານການຕ້ານຕໍ່ເຊື້ອດື້ຕໍ່ຢາ, ປະກອບສ່ວນເຂົ້າໃນເປົ້າໝາຍສຸຂະພາບທຸກທົ່ວໜ້າ (UHC) ໃນປີ 2025 ແລະ ເປົ້າໝາຍລຶບລ້າງມາລາເລຍໃນປີ 2030. ໃນພິທີປະກາດນີ້ ບັນດາປະເທດທີ່ໄດ້ຮັບການຊ່ວຍເຫຼືອ ຍັງໄດ້ຮ່ວມເຊັນລົງນາມໃນເອກະສານກ່ຽວກັບແຜນງານຮ່ວມມືກັບ TGA ກ່ຽວກັບໂຄງການດັ່ງກ່າວ.