ບົດຂ່າວໂດຍ: ວົງວຽງສາ ສິດທິເດດ ຮອງຫົວໜ້າພະແນກຢາພື້ນເມືອງ ແລະ ຜະລິດຕະພັນເສີມສຸຂະພາບ
ກອງປະຊຸມຝຶກອົບຮົມຄູ່ມືອາຊຽນ ກ່ຽວກັບຫຼັກການຜະລິດຢາທີ່ດີ ດ້ານຢາພື້ນເມືອງ ແລະ ຜະລິດຕະພັນເສີມສຸກຂະພາບ (GMP Guideline on Traditional Medicine and Health Supplement) ໄດ້ຈັດຂື້ນທີ່ ຫ້ອງປະຊຸມ ຣີສອດ ນາປ່າກວງ, ແຂວງວຽງຈັນ ໃນວັນທີ 8-10/1/2019 ນີ້. ເປັນກຽດເຂົ້າຮ່ວມ ແລະ ເປັນປະທານ ໂດຍ ທ່ານ ດຣ. ສີວົງ ແສງອາລຸນເດດ ຮອງຫົວໜ້າກົມອາຫານ ແລະ ຢາ ແລະ ມີບັນດາ ຄູຝືກ ກົມອາຫານ ແລະ ຢາຈາກກອງກວດກາອາຫານ ແລະ ຢາ, ສູນວິໃຈອາຫານ ແລະ ຢາ, ສະຖາບັນການແພດການຢາພື້ນເມືອງ, ຂະແໜງອາຫານ ແລະ ຢາ ນະຄອນຫຼວງ, ຄະນະພະແນກທີ່ກ່ຽວຂ້ອງ ພາຍໃນກົມອາຫານ ແລະ ຢາ, ກະຊວງສາທາລະນະສຸກ. ນອກຈາກນັ້ນ ພາກສວ່ນຜູ້ປະກອບການທີ່ດຳເນີນທຸລະກິດດ້ານຢາພື້ນເມືອງ ເປັນຕົ້ນ: ໂຮງງານຜະລິດຢາ ແລະ ຫ້ອງປຸງແຕ່ງຜະລິດຕະພັນຢາພື້ນເມືອງ ຈຳນວນ 17 ແຫ່ງ.
ກອງປະຊຸມຝຶກອົບຮົມໃນຄັ້ງນີ້ ແມ່ນຄັ້ງທຳອິດທີ່ໄດ້ຈັດຂຶ້ນ ຊຶ່ງຈຸດປະສົງແມ່ນເພື່ອເປັນການເຜີຍແຜ່ຄວາມຮູ້ພື້ນຖານ ແກ່ຜູ້ປະກອບການໄດ້ຮັບຮູ້ ແລະ ເຂົ້າໃຈ ຫຼັກການ ການປະຕິບັດ ການຜະລິດທີດີ ດ້ານຢາພື້ນເມືອງ ແລະ ຜະລິດຕະພັນເສີມສຸກຂະພາບ ເພື່ອໃຫ້ຜູ້ປະກອບການນຳເອົາບົດຮຽນ ມານຳໃຊ້ ເພື່ອປັບປຸງ ແລະ ພັດທະນາລະບົບການຜະລິດຢາພື້ນເມືອງຂອງຕົນ ຕາມລະບຽບຫຼັກການຂອງອາຊຽນ ເປົ້າໝາຍເພື່ອ ໃຫ້ໄດ້ຮັບຜະລິດຕະພັນຢາພື້ນເມືອງ ທີ່ໄດ້ຄຸນນະພາບ ແລະ ມີຄວາມປອດໄພ ຕໍ່ຜູ້ບໍລິໂພກ.
ຄາດຄະເນຜົນໄດ້ຮັບຂອງກອງປະຊຸມຝຶກອົບຮົມຄັ້ງນີ້ ແມ່ນໃຫ້ຜູ້ປະກອບການ ຮັບຮູ້ເຖິງຄວາມຄືບໜ້າໃນການເຊື່ອມໂຍງອາຊຽນດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບ. ຫຼັກການພື້ນຖານ ແລະ ບັນດາຂໍ້ກໍານົດຕ່າງໆທີ່ຮຽກຮ້ອງ ການຜະລິດທີ່ດີ.
ການອົບຮົມສະເພາະເພື່ອລົງເລິກສໍາລັບແຕ່ລະຫົວຂໍ້ ພາຍໃນ GMP ຈະໄດ້ສືບຕໍ່ກະກຽມໂດຍຄະນະກໍາມະການ GMP ຂອງກະຊວງສາທາລະນະສຸກ ເພື່ອອົບຮົມໃຫ້ແກ່ຜູ້ປະກອບການ ໄດ້ເຂົ້າໃຈຢ່າງເລິ່ງເຊິ່ງເຖິງຖອງ ແລະ ສາມາດນໍາໄປຈັດຕັ້ງປະຕິບັດໄດ້ ຕາມເງື່ອນໄຂຂອງແຕ່ລະໂຮງງານ
| 
