 ກອງປະຊຸມທົບທວນຄືນການຈັດຕັ້ງປະຕິບັດ ດຳລັດ 155/ນຍ
ບົດຂ່າວ: ພກ. ວົງວຽງສາ ສິດທິເດດ ຮອງຫົວໜ້າພະແນກຄຸ້ມຄອງຢາພື້ນເມືອງ ກອຢ
ກອງປະຊຸມທົບທວນຄືນການຈັດຕັ້ງປະຕິບັດ ດຳລັດ 155/ນຍ ລົງວັນທີ 30 ກັນຍາ 2003 ແລະ ຄຳສັ່ງແນະນຳ 252/ກຊສ ລົງວັນທີ 6 ມີນາ 2007 ວ່າດວ້ຍຊັບພະຍາ ກອນທຳມະຊາດທີ່ເປັນຢາ ໄດ້ຈັດຂື້ນທີ່ ຫ້ອງປະຊຸມ ນ້ຳສະອາດ, ແຂວງວຽງຈັນ ໃນວັນທີ 8/2/2019 ນີ້, ໂດຍການເປັນປະທານຂອງທ່ານ ດຣ. ບຸນຊູ ແກ້ວຫາວົງ ຮອງຫົວໜ້າກົມອາຫານ ແລະ ຢາ ແລະ ປະທານຮວ່ມ ໂດຍ ທ່ານ ດຣ. ຄຳພຽນ ວັນມະນີ ຄະນະພະແນກ ສາທາລະນະສຸກ ແຂວງ ວຽງຈັນ. ກອງປະຊຸມຍັງມີເຂົ້າຮວ່ມຈາກພາກສ່ວນຕ່າງໆ ເຊັ່ນ: ຫ້ອງການສາທາລະນະສຸກ, ອາຫານ ແລະ ຢາ , ກະສິກຳ ປ່າໄມ້ ຈາກ 5 ເມືອງ ຄື: ເມືອງ ແມດ, ເມືອງ ວັງວຽງ, ເມືອງ ຊະນະຄາມ, ເມືອງ ເຟືອງ ແລະ ເມືອງ ກາສີ ແລະ ຜູ້ເຂົ້າຮວ່ມຂັ້ນແຂວງ ທີ່ ມາຈາກຫລາຍຂະ ແໜງການເຊັ່ນ: ຫ້ອງວ່າການວັດທະນະທໍາ ສັງຄົມ (ສະພາປະຊາຊົນ ແຂວງ), ຫ້ອງວ່າການແຂວງ , ອຸດສະຫະກຳ ແລະ ການຄ້າ, ກະສິກຳ-ປ່າໄມ້, ຫ້ອງການ ປກສ, ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດວ້ຍທີມງານຈາກ ກົມອາຫານ ແລະ ຢາ ແລະ ຈາກ ຂະແໜງອາຫານ ແລະ ຢາ ລວມທັງໝົດ ຈຳນວນ 45 ທ່ານ ກໍ່ໄດ້ເຂົ້າຮວ່ມໃນກອງປະຊຸມ ໃນຄັ້ງນີ້.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອທົບທວນຄືນການຈັດຕັ້ງປະຕິບັດ ດຳລັດ 155/ນຍ, ຄໍາສັ່ງແນະນໍາ 252/ກຊສ ແລະ ນິຕິກໍາກ່ຽວຂອງກັບຢາພື້ນເມືອງ ແລະ ຊັບພະຍາກອນ ທໍາມະຊາດທີ່ເປັນຢາ ເພື່ອສືບຕໍ່ການເພີ່ມທະວີການສົ່ງເສີມ, ອະນຸລັກ, ການນໍາໃຊ້ໃຫ້ມີຄວາມປອດໄພ, ໃຫ້ເກີດປະສິດທິຜົນທາງດ້ານເສດຖະກິດ ແລະ ການຄຸ້ມຄອງ ປົກປັກຮັກສາ ຊັບພະຍາກອນທໍາມະຊາດທີ່ເປັນຢາ ໃຫ້ມີຄວາມຍືນຍົງ. ກອງປະຊຸມໄດ້ມີການລາຍງານສະພາບລວມຂອງການຈັດຕັ້ງປະຕິບັດວຽກງານການຄຸ້ມຄອງ ໂດຍສະເພາະລະບຽບການທີ່ກ່ຽວຂ້ອງ, ສະພາບການຂຸດຄົ້ນ, ເກັບຊື້, ປຸງແຕ່ງ, ຖອດຮີດ, ແລະ ປູກທົດແທນຊັບພະຍາກອນທໍາມະຊາດທີ່ເປັນຢາ ໃນຂອບເຂດທົ່ວປະເທດ ແລະ ສະພາບຂອງແຂວງວຽງຈັນ ໃນການຈັດຕັ້ງປະຕິບັດກ່ຽວກັບວຽກງານຄຸ້ມຄອງຊັບພະຍາກອນທຳມະຊາດທີ່ເປັນຢາ.
ໃນໄລຍະຜ່ານມາ ຕໍ່ກັບວຽກງານການຄຸ້ມຄອງ ຊັບພະຍາກອນທຳມະຊາດທີ່ເປັນຢາ ແມ່ນໄດ້ ມີສວ່ນຮວ່ມ ຈາກຫຼາຍຂະແຫນງການທີ່ກ່ຽວຂ້ອງ ໃນການຄຸ້ມຄອງ ປົກປັກຮັກສາ, ອະນຸຍາດການຂຸດຄົ້ນ ແລະ ສົ່ງເສີມບັນດາຫົວໜ່ວຍທຸລະກິດເພື່ອການຜະລິດ ເປັນສິນຄ້າ ກໍ່ຄືການຫັນສິນຄ້າເປັນຜະລິດຕະພັນ ທີ່ໄດ້ຮັບມູນຄ່າເພີ້ມ. ແຕ່ເຖິງຢ່າງໃດກໍ່ຕາມ ຂອດການປະສານງານ ລວມທັງການປະຕິບັດລະບຽບກົດໝາຍ ຂອງແຕ່ລະຂະແໜງການ ຍັງປະສານສົມທົບກັນບໍ່ທັນຮັດກຸມເທົ່າທີ່ຄວນ ຍັງມີສະພາບການຂຸດຄົ້ນພືດ ແລະ ຕົ້ນໄມ້ທີ່ເປັນຢາສົ່ງອອກຈໍານວນຫຼາຍໂດຍຖືເປັນເຄື່ອງປ່າຂອງດົ່ງ ຊຶ່ງບໍ່ສອດຄ່ອງກັບດໍາລັດ ແລະ ຄໍາສັ່ງຕ່າງໆ ທີ່ລັດວາງອອກ ເຊິ່ງມີຄວາມສ່ຽງຂອງການດັບສູນຜະລິດຕະພັນພືດ ແລະ ຕົ້ນໄມ້ທີ່ເປັນຢາ. ກອງປະຊຸມໄດ້ຮ່ວມກັນຄົ້ນຄ້ວາ ແລະ ປຶກສາຫາລືທິດທາງຕໍ່ໜ້າກ່ຽວກັບວຽກງານປະສານງານການຄຸ້ມຄອງຊັບພະຍາກອນທໍາມະຊາດທີ່ເປັນຢາ ເຊັ່ນ: ການປັບປຸງດຳລັດ 155/ນຍ, ການສະເໜີເອົາລາຍການພືດທີ່ເປັນຢາ 119 ລາຍການ ແລະ ເຫັດຈໍານວນ 7 ສະນິດ ເພື່ອໃຫ້ຂຶ້ນເປັນບັນຊີສະເພາະພືດ ແລະ ຕົ້ນໄມ້ທີ່ເປັນຢາ ທີ່ຈະຕ້ອງຄຸ້ມຄອງຢູ່ໃນຂອບເຂດການຄຸ້ມຄອງຂອງກະຊວງສາທາລະນະສຸກ. ກອງປະຊຸມຄັ້ງນີ້ໄດ້ມີຄວາມເປັນເອກະພາບຈາກຂະແໜງການກ່ຽວຂ້ອງອ້ອມຂ້າງແຂວງ ແລະ ເມືອງທີ່ຕ້ອງເພີ້ມທະວີການເອົາໃຈໃສ່ ໃນການຄຸ້ມຄອງຊັບພະຍາກອນທໍາມະຊາດ ທີ່ເປັນຢາໃຫ້ສອດຄ່ອງຕາມແນວທາງນະໂຍບາຍຂອງຂັ້ນເທິງໄດ້ວາງອອກ.
|
