ໂດຍ: ນາງ ກອງມະນີ ນາມມະວົງມີໄຊ

ຫົວໜ້າພະແນກຄຸ້ມຄອງຂ່າວສານ, ກົມອາຫານ ແລະ ຢາ

ໃນ​​ກາງເດືອນ 8/2015 ຜ່ານມາ ກົມອາຫານ ແລະ ຢາ ກະຊວງສາທາລະນະສຸກ ພາຍໃຕ້ການເປັນປະທານຂອງ ທ່ານ ດຣ. ລາໍພອນ ສີຫາຄັງ ຮອງຫົວໜ້າກົມອາຫານ ແລະ ຢາ ໄດ້ເປີດຊຸດອົບຮົມຄູ​ຝຶກ​ໃຫ້​ພະນັກງານສາທາລະນະສຸກ​ຂັ້ນ​ແຂວງ​ແລະ​ເມືອງ 06 ເມືອງ( ເມືອງຈຳປາສັກ, ປາກເຊ, ຊະນະສົມບູນ, ສຸຂຸມາ, ບາຈຽງ ແລະ ເມືອງໂພນທອງ)​ ກ່ຽວ​ກັບ​ວິທີ​ການ​ເຜີຍ​ແຜ່​ຂໍ້​ມູນ​ຂ່າວສານ​ຕ້ານ​ການດື້ຕໍ່ຢາປົວໄຂ້ຍຸງ ຢູ່ແຂວງຈຳປາສັກ, ຊຶ່ງມີຜູ້ເຂົ້າຮ່ວມທັງໝົດ 27 ທ່ານໃນນັ້ນເປັນເພດຍິງ 07. ເພື່ອ​ໃຫ້ຄູຝຶກໄດ້ຮັບຮູ້ ກ່ຽວກັບສະພາບການດື້ຢາ Artemisininຂອງເຊື້ອໄຂ້ຍຸງ, ສະພາບຢາປອມ ແລະ ຢາຕົກມາດຕະຖານ ແລະ ການນຳໃຊ້ຢາປິ່ນປົວໄຂ້ຍຸງຢ່າງສົມເຫດ ສົມຜົນ ເຊິ່ງຜູ້ເຂົ້ຮ່ວມ ພາຍຫລັງຈົບການອົບຮົມສາມາດນຳໄປເຜີຍແຜ່ຕໍ່ໃຫ້ພະນັກງານ​ແພດ​ໝໍ, ທະຫານ, ຜູ້​ຈຳໜ່າຍ​ຢາ​ແລະ​ປະຊາຊົນ (ນາຍບ້ານ, ແມ່ຍິງບ້ານ, ແນວໂຮມ, ອສປ, ຜູ້ໃຊ້ແຮງງານ....) ຢູ່ໃນຂັ້ນເມືອງ ແລະ ໃເຂດຄຸ້ມຄອງຂອງຕົວໄດ້.

​ໃນການຈັດຕັ້ງການອົບຮົມ ຄັ້ງນີ້ ແມ່ນໄດ້ຮັບການສະໜັບສະໜູນດ້ານງົບປະມານ ຈາກ ກອງທຶນໂລກ ໂດຍຜ່ານ ໂຄງການ ຕ້ານການດື້ຕໍ່ຢາ (RAIProgram). ພາຍຫລັງ ການອົບຮົມແລ້ວໂຄງການ ຈະໄດ້ສະໜອງງົບປະມານ ໃຫ້ບັນດາແຂວງເພື່ອນຳ​ເອົາ​ບົດຮຽນພ້ອມ​ປະສົບ​ປະການ​ໄປຜັນ​ຂະຫຍາຍ​ແລະເຜີຍ​ແຜ່ໃຫ້​ແກ່​ກຸ່ມ​​ເປົ້າ​ໝາຍ​ດັ່ງກ່າວ​ໃຫ້​ເຂົ້າ​ໃຈ ແລະ ຫຼີກລ້ຽງການນໍາໃຊ້ຢາຊະຊາຍ, ໂດຍສະເພາະການຫ້ສຸຂະສຶກສາແກ່ຄົນເຈັບ ເວລາເຈັບເປັນຖ້າສົງໃສເປັນໄຂ້ຍຸງ ຫ້າມເດັດຂາດບໍ່ໃຊ້ຢາArtesunateຊະນິດເມັດເພາະຈະພາໃຫ້ເຊື້ອພະຍາດໄຂ້ຍຸງດື້ຕໍ່ຢາ.

ຢາ Artemisinin ເປັນຢາທີ່ມີປະສິດທິພາບ ປະສິດທິຜົນໃນປິ່ນປົວ ຢາໄຂ້ຍຸງ P. falciparum, ແຕ່ປະຈຸບັນ ໄດ້ມີລາຍງານການດື້ຕໍ່ຂອງເຊື້ອພະຍາດໄຂ້ຍຸງ ຕໍ່ກັບຢາ ດັ່ງກ່າວ ໃນນັ້ນ ລວມທັງ ຢູ່ພາກໃຕ້ ຂອງ ສປປ ລາວ ເຊິ່ງໄດ້ມີການລາຍງານການດື້ຢາ. ອົງການອະນາໄມໂລກ ໄດ້ແນະນໍາໃຫ້ ໃຊ້ຢາ  Artemisinin ໃນຮູບຢາປະສົມ (Combination therapy) ເພື່ອຮັກສາປະສິດທິພາບຢາດັ່ງກ່າວໄວ້ໃຫ້ເປັນເວລາດົນ. ສໍາລັບຢາ Arthemisinin ໃນຮູບແບບຊະນິດເມັດດຽວ  ເປັນຢາທີ່ນ້ອນຢູ່ໃນບັນຊີຢາຕ້ອງຫ້າມ ຂອງສປປ ລາວສະບັບປະກາດໃຊ້ໃນປະຈຸບັນ. ຖ້າກວດພົບການນໍາເຂົ້າ, ຈໍາໜ່າຍ ຈະຖືກປະຕິບັດມາດຕະການຕາມລະບຽບກົດໝາຍທີ່ກະຊວງສາທລະນະສຸກວາງອອກຢ່າງເຄັ່ງຄັດ.