ກອງປະຊຸມປຶກສາຫາລືວຽກງານຄຸ້ມຄອງສານເຄມີ
ບົດຂ່າວໂດຍ: ທ່ານ ນາງ ກອງມະນີ ນາມມະວົງມີໄຊ ຫົວໜ້າພະແນກຂ່າວສານ ອຢ
ໃນລະຫວ່າງວັນທີ 6-7 ມັງກອນ 2021 ກົມອາຫານ ແລະ ຢາໄດ້ເປີດກອງປະຊຸມປຶກສາຫາລືກ່ຽວກັບວຽກງານຄຸ້ມຄອງສານເຄມີຂຶ້ນຢູ່ທີ່ກະຊວງສາທາລະນະສຸກ ໂດຍການເປັນປະທານຂອງທ່ານ ດຣ. ນ. ວຽງໄຊ ວັນສີລາລົມ ຮອງຫົວໜ້າກົມອາຫານ ແລະ ຢາ ເຊິ່ງກອງປະຊຸມດັ່ງກ່າວໄດ້ແບ່ງເປັນສອງພາກສ່ວນຄື: ມື້ທີ່ນຶ່ງແມ່ນພາກສ່ວນລັດທີ່ມີໜ້າທີ່ຄຸ້ມຄອງສານເຄມີ ທີ່ມາຈາກກະຊວງອຸດສາຫະກຳ ແລະ ການຄ້າ, ກົມພາສີ, ກະຊວງກະສິກຳ-ປ່າໄມ້, ກົມສົ່ງເສີມການລົງທືນ, ຫ້ອງການຄຸ້ມຄອງເຂດເສດຖະກິດພິເສດ, ຫ້ອງການກະຊວງສາທາລະນະສຸກ, ກອງກວດກາອາຫານ ແລະ ຢາ, ສູນວິໄຈອາຫານ ແລະ ຢາ ແລະ ພະແນກການພາຍໃນກົມອາຫານ ແລະ ຢາ ລວມມີ 30 ທ່ານ ແລະ ມື້ທີ່ສອງແມ່ນພາກສ່ວນທຸລະກິດທີ່ນຳເຂົ້າສານເຄມີລວມມີ 40 ທ່ານ.
ຈຸດປະສົງຂອງກອງປະຊຸມເພື່ອທົບທວນ ແລະ ປຶກສາຫາລືກ່ຽວກັບວຽກງານການຄຸ້ມຄອງສານເຄມີເຂົ້າໃນການຜະລິດ, ການນຳເຂົ້າ-ສົ່ງອອກ-ສົ່ງຜ່ານ, ການຈຳໜ່າຍ, ການເກັບຮັກສາ ແລະ ການນຳໃຊ້ເຄມີຄວບຄຸມເຂົ້າໃນວົງການແພດ, ການຢາ, ຄົ້ນຄ້ວາວິທະຍາສາດ ໂດຍອີງໃສ່ ກົດໝາຍ ແລະ ລະບຽບການທີ່ກ່ຽວຂ້ອງຂອງຂະແໜງສາທາລະນະສຸກ ທີ່ວາງອອກ. ໃນວາລະການປະຊຸມຜູ້ເຂົ້າຮ່ວມ ໄດ້ແລກປ່ຽນຄຳຄິດກ່ຽວກັບການຈັດຕັ້ງປະຕິບັດວຽກງານທີ່ກ່ຽວຂອງກັບພາລະບົບບາດ ແລະ ຂອບເຂດສິດ ແລະ ໜ້າທີ່ ທີ່ຂະແໜງການຕົນຮັບຜິດຊອບກ່ຽວກັບການອອກອະນຸຍາດນຳເຂົ້າສານເຄມີຄວບຄຸມ ແລະ ສານເຄມີທົ່ວໄປຍັງທີ່ມີຫຼາຍພາກສ່ວນອອກອະນຸຍາດ, ການເກັບຮັກສາ; ບັນຫາກ່ຽກັບການນຳໃຊ້ບໍ່ຖືກຫຼັກວິຊາການ, ກົນໄກການປະສານງານລະຫວ່າງ ຂະແໜງການທີ່ກ່ຽວຂ້ອງ, ຄວາມສະດວກ ແລະ ຄວາມຫຍຸ້ງຍາກຂອງພາກສ່ວນຜູ້ປະກອບການໃນການຂໍອະນຸຍາດ ແລະ ການຈັດຕັ້ງປະຕິບັດລະບຽບການ, ການສ້າງ, ປັບປຸງ ແລະ ຈັດຕັ້ງປະຕິບັດບັນດານິຕິກຳຂອງຂະແໜງການທີ່ກ່ຽວຂ້ອງ ແລະ ວາງແຜນແກ້ໄຂຮ່ວມກັນ.
ກອງປະຊຸມໄດ້ມີ ຄຳຄິດຄຳເຫັນ ແລກປ່ຽນ ແລະ ເປັນເອກະພາບສະເໜີ ໃນທິດທາງຕໍ່ໜ້າເພື່ອປັບປຸງວຽກງານຄຸ້ມຄອງເຄມີຄວບຄຸມຄື: ສະເໜີໃຫ້ມີການປັບປຸງ ບາງມາດຕາຂອງກົດໝາຍວ່າດ້ວຍການຄຸ້ມຄອງເຄມີສະບັບນຳໃຊ້ປະຈຸບັນ ເພື່ອໃຫ້ສອດຄ່ອງກັບລະບຽບການຄຸ້ມຄອງທີ່ກະຊວງສາທາລະນະສຸກວາງອອກ ເປັນຕົ້ນການຄຸ້ມຄອງເຄມີຄວບຄຸ; ໃຫ້ປະຊຸມທົບທວນ ແລະ ປຶກສາຫາລື ລະຫວ່າງຂະແໜງການສາທາລະນະສຸກ ແລະ ຂະແໜງການທີ່ກ່ຽວຂ້ອງ ກ່ຽວກັບພາລະບົດບາດ ແລະ ຄວາມຮັບຜິດຊອບ ເພື່ອຫຼີກລ້ຽງຄວາມຊ້ຳຊ້ອນໃນການຄຸ້ມຄອງ. ສະເໜີໃຫ້ພະແນກຢາເສບຕິດ, ເຄມີ ແລະ ເຄື່ອງສໍາອາງ ຂອງກົມອາຫານ ແລະ ຢາ ເປັນເຈົ້າການໃນການປະສານງານຫາອົງການຄຸ້ມຄອງຢາເສບຕິດສາກົນ (INCB) ເພື່ອສະເໜີໃຫ້ ກະຊວງອຸດສາຫະກໍາ ແລະ ການຄ້າ ມີສ່ວນຮ່ວມໃນການຄຸ້ມຄອງ ແລະ ແຈ້ງຕອບລະບົບການແຈ້ງເຕືອນກ່ອນການນໍາເຂົ້າ (Pre-Export Notification Online ຫຼື PEN-Online); ສະເໜີໃຫ້ແຕ່ລະຂະແໜງການທີ່ກ່ຽວຂ້ອງກວດກາ ແລະ ຕິດຕາມ ໃນການນໍາໃຊ້ສານເຄມີຄວບຄຸມຕາມພາລະບົດບາດຂອງຕົນ ເພື່ອຮັບປະກັນໃຫ້ຂອດຂອງການຈັດຕັ້ງປະຕິບັດການຄຸ້ມຄອງມີປະສິດທິພາບ, ປະສິດທິຜົນ ແລະ ຫຼີກລ້ຽງການນໍາໃຊ້ສານເຄມີໄປໃນທາງທີ່ບໍ່ຖືກຕ້ອງ.
|
