ໄດ້ຮັບກຽດເປັນປະທານ ເປີດໂດຍ ທ່ານ ສາດສະດາຈານ ດຣ. ເອກສະຫວ່າງ ວົງວິຈິດ ກໍາມະການສູນກາງພັກ, ລັດຖະມົນຕີວ່າການກະຊວງສາທາລະນະສຸກ. ມີທ່ານ ຫົວໜ້າກົມ ອາຫານແລະຢາ, ກອງເລຂາອາຊຽນ ກົມກອງອ້ອມຂ້າງກະຊວງ ໂດຍມີຜູ້ແທນເຂົ້າຮ່ວມ ຈາກບັນດາເຈົ້າໜ້າທີ່ຄຸ້ມຄອງດ້ານຢາພື້ນເມືອງ ແລະ ການແພດທາງເລືອກຈາກບັນດາປະເທດສະມາຊິກ ຄື: ບຣູໄນ ດາຣູສະຣັມ, ກໍາປູເຈຍ, ອິນໂດເນເຊຍ, ສປປ ລາວ, ມາເລເຊຍ, ຟີລິບປິນ, ໄທ, ສສ ຫວຽດນາມ ລວມທັງໝົດ 40 ກ່າວທ່ານ.

ກອງປະຊຸມຄັ້ງນີ້ແມ່ນກຳນົດຈຸດປະສົ່ງເພື່ອສ້າງຄວາມເຂັ້ມແຂງໃຫ້ແກ່ການຮ່ວມມືແລະແລກປ່ຽນບົດຮຽນເຊິ່ງກັນ ແລະກັນ ດ້ານວຽກງານການແພດ ​ແລະ ​ການ​ຢາພື້ນເມືອງບັນດາ​ປະ​ເທດ​ອາ​ຊຽນກໍ່ໄດ້ຈັດກອງປະຊຸມ 5 ຄັ້ງຜ່ານມາ. ຄັ້ງ​ທີ 1 ທີ່ປະເທດໄທ ໃນປີ 2009, ຄັ້ງທີ 2 ຈັດຂື້ນທີ່ຫວຽດນາມ ໃນປີ 2010, ຄັ້ງທີ 3 ຈັດຂື້ນທີ່ ອິນໂດເນເຊຍ ໃນປີ 2011 ​ແລະ ຄັ້ງ​ທີ 4 ທີ່ປະ​ເທດ​ມາ​ເລ​ເຊຍ ​ໃນ​ປີ 2012. ​ປະ​ເທດ​ມຽນ​ມາຄັ້ງທີ 5 ປີ 2014 ແລະ ສປປລາວ ພວກເຮົາແມ່ນຄັ້ງທີ 6

ເພື່ອໃຫ້ໄດ້ຮັບຜົນປະໂຫຍດສູງສຸດ ຈາກການນໍາໃຊ້ຢາ ເຂົ້າໃນການປິ່ນປົວ, ປະຈຸບັນບັນດາໜ່ວຍງານຕ່າງໆ ທີ່ກ່ຽວຂ້ອງຂອງ ອາຊຽນ ໄດ້ຮັບການສ້າງຕັ້ງຂຶ້ນ ເພື່ອຄົ້ນຄ້ວາກໍານົດລະບຽບການ, ມາດຕະຖານທາງດ້ານຢາ ແລະ ໃນນັ້ນລວມທັງໜ່ວຍງານສະເພາະກິດດ້ານຢາພື້ນເມືອງກໍ່ແມ່ນໜ່ວຍງານໜຶ່ງທີ່ໄດ້ຮັບການສ້າງຕັ້ງຂຶ້ນເຊິ່ງກອງປະຊຸມເພື່ອຮ່ວມມືປະສານງານດ້ານການພັດທະນາຢາພື້ນເມືອງ

ກອງປະຊຸມໄດ້ຮັບຟັງການລາຍງານຂອງກອງເລຂາອາຊຽນໂດຍສະເພາະຜົນສໍາເລັດຂອງກອງປະຊຸມຂັ້ນສູງຕ່າງໆກ່ຽວກັບວຽກງານສາທາລະນະສຸກທີ່ຕິດພັນກັບວຽກງານດ້ານຢາພື້ນເມືອງ ແລະເຫດການທີ່ສໍາຄັນໃນປີທີ່ຜ່ານມມາ ປີ 2014 ທັງເປັນການສືບຕໍ່ຈັດຕັ້ງຜັນຂະຫຍາຍ ແຜນແມ່ບົດຂອງອາຊຽນ(ASEAN BLUE PRINT)ພາຍໃຕ້ຄັນເສົາຄໍ້າດ້ານວັດທະນະທໍາ-ສັງຄົມ ເປັນຕົ້ນຮັບຝັງລາຍງານຜົນສໍາເລັດຂອງກອງະຊຸມລັດຖະມົນຕີສາທາລະນະສຸກອາຊຽນ ແລະ ກອງປະຊຸມເຈົ້າໜ້າທີ່ອະວຸໂສດ້ານການພັດທະນາສາທາລະນະສຸກ ((ASEAN Health Ministers Meeting-AHMM), SOMHD)), ລາຍງານຜົນສໍາເລັດຂອງກອງປະຊຸມ ATFTMຄັ້ງທີ 5 ຜ່ານມາ ທີ່ ສະຫະພາບມຽນມາເປັນເຈົ້າພາບ ແລະ ກອງປະຊຸມ ໜ່ວຍງານອື່ນໆ ທີ່ກ່ຽວຂ້ອງເຊັ່ນ: ໜ່ວຍງານ ພັດທະນາດ້ານຢາຫຼວງ (AWGPD), ໜ່ວຍງານຊ່ຽວຊານດ້ານຢາພື້ນເມືອງ (AEG-HMP), ກອງປະຊຸມ ໜ່ວຍງານອາຊຽນດ້ານຢາພື້ນເມືອງ ແລະ ຜະລິດຕະພັນເສີມສຸຂະພາບ (TMHS-PWG) ແລະ ກອງປະຊຸມການຮ່ວມມືອື່ນໆ ທີ່ສໍາຄັນເປັນຕົ້ນ ASEAN-Chinaໂດຍສະເພາະບັນດາກອບການຮ່ວມມືຂອງບັນດາປະເທດສະມາຊິກຈະໄດ້ສືບຕໍ່ສົນທະນາແຜນງານປະຕິບັດລະອຽດ ໄລຍະກອງປະຊຸມຄັ້ງນີ້.

ໃນວາລະກອງປະຊຸມ,ບັນດາປະເທດອາຊຽນຍັງໄດ້ຟັງການລາຍງານຄວາມຄືບໜ້າຂອງການຈັດຕັ້ງປະຕິບັດແຜນວຽກງານໜ່ວຍງານສະເພາະກິດຂອງອາຊຽນ ດ້ານຢາພື້ນເມືອງ (ATFTM)ທີ່ໄດ້ຮ່ວມກັນຈັດຕັ້ງປະຕິບັດໃນໄລຍະຜ່ານມາແລະສົນທະນາແລກປ່ຽນຄວາມຄືບໜ້າເຊັ່ນ: ແຜນການອໍານວຍຄວາມສະດວກໃຫ້ແກ່ພາກພື້ນໃນການສົ່ງເສີມ ແລະ ເຊື່ອມໂຍງຜະລິດຕະພັນຢາພື້ນເມືອງທີ່ປອດໄພ, ປະສິດທິພາບ ແລະ ຄຸນນະພາບ ເຂົ້າໃນລະບົບຮັກສາສຸຂະພາບຂອງຊາດ; ແຜນງານສົ່ງເສີມການນໍາໃຊ້ຢາພື້ນເມືອງ ເຂົ້າໃນຕາໜ່າງຮັກສາສຸຂະພາບຂັ້ນຕົ້ນ; ແຜນງານສ້າງຄວາມເຂັ້ມແຂງກ່ຽວກັບຄວາມຮູ້ດ້ານຢາພື້ນເມືອງຜູ້ສະໜອງການບໍລິການ ຫຼື ແພດໝໍໂດຍຜ່ານການອົບຮົມ ດ້ານການນໍາໃຊ້ຢາພື້ນເມືອງ; ແຜນງານການສ້າງຄວາມອາດສາມາດຂອງປະເທດສະມາຊິກກ່ຽວກັບ ການຄົ້ນຄ້ວາດ້ານປະສິດທິພາບ ຄວາມປອດໄພ ແລະ ຄຸນນະພາບຂອງຢາພື້ນເມືອງ ເຊິ່ງບັນດາກິດຈະກໍາຕ່າງໆ ລະອຽດຂອງແຜນງານເຫຼົ່ານັ້ນໄດ້ຍົກຂຶ້ນມາສະເໜີໂດຍບັນດາປະເທດທີ່ຮັບຜິດຊອບໃນການກະກຽມເອກະສານອື່ນໆທີ່ໄດ້ກໍາລັງພັດທະນາໂດຍປະເທດທີ່ໄດ້ຮັບມອບໝາຍເພື່ອຄວາມເປັນເອກະພາບ.ນອກຈາກນີ້ການປະເມີນການຈັດຕັ້ງປະຕິບັດແຜນປະຕິບັດຂອງໜ່ວຍງານ  ແລະ ແຜນຍຸດທະສາດພາຍຫລັງ ປີ 2015 ກໍ່ໄດ້ຍົກຂຶ້ນມາສົນທະນາ.

ສໍາລັບວຽກງານພັດທະນາດ້ານຢາພື້ນເມືອງລາວ ຜ່ານມາແມ່ນໄດ້ຮັບຄວາມເອົາໃຈໃສ່ ແລະເປັນຫ່ວງເປັນໃຍສູງຈາກລັດຖະບານສປປ ລາວ ມາຢ່າງເປັນປະຈຳ, ໂດຍສະເພາະວຽກງານຢາພື້ນເມືອງແມ່ນໄດ້ເປັນອົງປະກອບໜຶ່ງທີ່ໄດ້ລະບຸຢູ່ໃນນະໂຍບາຍແຫ່ງຊາດດ້ານຢາຂອງກະຊວງສາທາລະນະສຸກທັງໄດ້ກໍານົດຢູ່ໃນຍຸດທະສາດໄລຍະສັ້ນ ແລະ ຍາວຂອງການພັດທະນາຢາພື້ນເມືອງກະຊວງສາທາລະນະສຸກ ລວມທັງການສົ່ງເສີມ ແລະ ພັດທະນາຢາພື້ນເມືຶຶອງ ໃຫ້ກ່າຍເປັນຢາພື້ນເມືອງທີ່ຄຸນນະພາບ ມີຄວາມປອດໄພໃຫ້ແກ່ຜູ້ບໍລິໂພກທັງປະກອບສ່ວນເຂົ້າໃນຕາໜ່າງການບໍໍລິການສາທາລະນະສຸກໃນສປປ ລາວໃນແຕ່ລະຂັ້ນ.

ບົດຂ່າວໂດຍ: ດຣ. ບຸນເລື່ຶອນ ດວງເດືອນ, ຫົວໜ້າພະແນກຄຸ້ມຄອງຢາພື້ນເມືອງ