16 ອາການທີ່ເຕືອນໄພເຖິງຄວາມສ່ຽງຂອງພະຍາດເບົາຫວານ

ບົດຂ່າວໂດຍ: ດ.ຣ. ສົມທະວີ ຈາງວິສົມມິດ

      ເບົາຫວານແມ່ນພະຍາດຊໍາເຮື້ອຊະນິດໜຶ່ງ ແລະ ເປັນພະຍາດທີ່ບໍ່ຕິດຕໍ່ ແຕ່ເປັນພະຍາດທີ່ແຜ່ຫຼາຍໃນປະຈຸບັນ. ຜູ້ທີເປັນພະຍາດເບົາຫວານ ມີຄວາມສຽງທີ່ຈະພາໃຫ້ເກີດພະຍາດແຊກຊ້ອນອື່ນໆ ເຊັ່ນ: ຕາບໍ່ເຫັນຫຸ່ງ(ຕາບອດ), ພະຍາດຫົວໃຈ, ໝາກໄຂ່ຫຼັງຊຸດໂຊມ, ຕີນມືເປັນບາດແຜ ປິ່ນປົວໄດ້ຍາກ ຫຼືປິ່ນປົວບໍ່ຫາຍ ບໍ່ໄດ້ຮັບຜົນບາງກໍລະນີຕ້ອງໄດ້ຕັດແຂນຂາອອກ.

      ການຜັນແປຂອງພະຍາດເບົາຫວານໄດ້ສົ່ງຜົນສະທ້ອນອັນບໍ່ດີເຖິງຊີວິດການເປັນຢູ່ຂອງບຸກຄົນ ແລະ ຄອບຄົວ ມີບາງປະກົດການຫຼືອາການທີ່ຈະຕ້ອງໄດ້ຍົກສູງສະຕິລະວັງຕົວຕໍ່ພະຍາດເບົາຫວານ ຖ້າຫາກວ່າທ່ານມີອາການດັ່ງລຸ່ມນີ້:

1.   ຫິວນໍ້າ, ຫິວເຂົ້າ, ໄປຖ່າຍເບົາດຸ ແລະ ອິດເມື່ອຍ.

2.   ນໍ້າໜັກຫຼຸດລົງ ໂດຍບໍ່ຮູ້ສາເຫດ, ພິເສດແມ່ນໄລຍະຕົ້ນ ຄົນໄຂ້ຈະເປັນຄົນຕຸ້ຍພີ ແຕ່ຕໍ່ມາຈະຈ່ອຍລົງ ນໍ້າໜັກຄ່ອຍໆຫຼຸດລົງ.

3.   ມັກຈະເປັນແຜເປື່ອຍໄດ້ງ່າຍ, ເປັນຝີໂດຍສະເພາະ ແມ່ນມັກຈະເກີດຂື້ນໃນລະດູໜາວ.

4.   ທຽວໄປຖ່າຍເບົາຫຼາຍເທື່ອເຊິ່ງເປັນຕົ້ນເຫດອັນໜຶ່ງທີ່ພາໃຫ້ຕິດເຊື້ອພະຍາດເຂົ້າສູ່ລະບົບລໍາໄສ້, ປອດ ແລະ ອະໄວຍະວະອື່ນໆຂອງຮ່າງກາຍ.

5.   ສຳລັບເພດຍິງ ດ້ານນອກຂອງອະໄວຍະວະເພດມັກມີອາການຄັນ ແລະ ກ້າວໄປສູ່ການຊຶມເຊື້ອ.

6.   ມີຄວາມຮູ້ສຶກວ່າເສັ້ນປະສາດຕາຍ, ຖືກກົດໜ່ວງ, ມີອາການເຈັບປວດ ແລະ ອັກເສບປາຍປະສາດ.

7.   ສາຍຕາຊຸດໂຊມ, ແກ່ນຕາຂຸ້ນມີບັນຫາຂັດຂ້ອງ.

8.   ບາດຍ່າງບໍ່ທ່ຽງ ແລະ ຮູ້ສຶກເຈັບປວດໃນບາງຄັ້ງບາງຄາວ.

9.   ມີບາດແຜເປື່ອຍຢູ່ຕາມຕີນມື ທີ່ຫາຍໄດ້ຍາກ.

10. ຍ່ຽວອອກບໍ່ໝົດ ຫຼື ຍ່ຽວຄ້າງໃນເວລາຖ່າຍເບົາ, ຖອກທ້ອງ ຫຼື ຖ່າຍບໍ່ອອກ(ອາຈົມແຂງຕົວເປັນກ້ອນ).

11. ຕົນໂຕເປັນບວມ.

12. ໄລຍະຕົ້ນຈະເຮັດໃຫ້ເສັ້ນເລືອດແຂງຕົວ, ເຈັບແໜ້ນໜ້າເອິກ, ກ້າວໄປເຖິງເສັ້ນເລືອດຝອຍແຕກ.

13. ນໍ້າໜັກຮ່າງກາຍເພີ່ມຂື້ນອາດເຖິງ 4 ກິໂລກຼາມ.

14. ຄວາມດັນເລືອດຫຼຸດລົງກະທັນຫັນຍ້ອນຫິວໂຫຍ, ຢ້ານກົວ, ເຫື່ອອອກຫຼາຍ.

15. ຄົນໄຂ້ຈະຕຸ້ຍພີຂື້ນ ຫຼື ຈ່ອຍຜອມລົງ.

16. ຢູ່ໃນຄອບຄົວຂອງຄົນໄຂ້ອາດຈະມີບາງຄົນເຄີຍເປັນເບົາຫວານຢູ່ໃນໄວອາຍຸປະມານ 40 ປີ.

      ສັນຍາລັກຈາກ 16 ຢ່າງທີ່ກ່າວມາຂ້າງເທິງ, ສະແດງໃຫ້ທ່ານຮູ້ວ່າພະຍາດເບົາຫວານ ແມ່ນພະຍາດຊໍາເຮື້ອທີ່ບໍ່ຕິດຕໍ່ ແຕ່ຊໍ້າພັດເປັນພະຍາດທີ່ແຜ່ຫຼາຍໃນຍຸກປັດຈຸບັນ ເປັນພະຍາດທີ່ມີອັດຕາສ່ວນແຜ່ລາມນັບມື້ເພີ່ມຂຶ້ນໃນທົ່ວໂລກ.

      ເບົາຫວານເປັນພະຍາດທີ່ສົ່ງຜົນກະທົບທາງລົບໃຫ້ແກ່ທຸກກ່ມຄົນເພດໄວ, ຖ້າເປັນແລ້ວຈະປິ່ນປົວໃຫ້ຫາຍຂາດແມ່ນຍາກຫຼາຍ, ແຕ່ສາມາດປ້ອງກັນໄດ້ດ້ວຍຫຼາຍວິທີທາງ ໃນນີ້ວິທີທາງອັນໜຶ່ງທີ່ທຸກຄົນຄວນຄຳນຶງເຖິງ ແມ່ນ ການກວດຫາທາດນໍ້າຕານໃນຮ່າງກາຍແຕ່ຫົວທີ, ອອກກຳລັງກາຍໃຫ້ສະໝໍ່າສະເໝີ, ເລືອກດື່ມກີນອາຫານທີ່ເໝາະສົມ ແລະ ມີຄວາມປອດໄພທາງດ້ານຄຸນນະພາບປະລິມານ ແລະ ເປັນປະໂຫຍດໃຫ້ແກ່ສຸກຂະພາບຮ່າງກາຍຂອງຕົນເອງ.