ໃນທຸກໆປີ, ອົງການອະນາໄມໂລກໄດ້ເລືອກເອົາຫົວຂໍ້ບຸລິມະສິດທີ່ເປັນບັນຫາສໍາຄັນທາງດ້ານສາທາລະນະສຸກເປັນຫົວຂໍ້ຂອງງານສະເຫຼີມສະຫຼອງວັນສຸຂະພາບໂລກ. ສໍາລັບປີນີ້ຫົວຂໍ້ຂອງວັນສຸຂະພາບໂລກແມ່ນຄວາມປອດໄພຂອງອາຫານ ຊຶ່ງແມ່ນຂົງເຂດຂອງວຽກງານສາທາລະນະສຸກທີ່ມີເປົ້າໝາຍໃນການປົກປ້ອງຜູ້ບໍລິໂພກ ຈາກຄວາມສ່ຽງຈາກອາຫານເປັນພິດ ແລະ ພະຍາດທີ່ເກີດຈາກອາຫານ ຫຼື ຊໍາເຮື້ອ.

“ອົງການອະນາໄມໂລກ (WHO) ແມ່ນມີຄວາມຍິນດີໃນການເຮັດວຽກກັບກະຊວງສາທາລະນະສຸກ ແລະບັນດາກະຊວງທີ່ກ່ຽວຂ້ອງເຊັ່ນ: ກະຊວງສຶກສາທິການ, ກະຊວງຖະແຫຼງຂ່າວ, ວັດທະນາທໍາແລະທ່ອງທ່ຽວ, ກະຊວງອຸດສະຫະກໍາແລະການຄ້າ, ກະຊວງກະສິກໍາແລະປ່າໄມ້, ກະຊວງການຕ່າງປະເທດແລະຫ້ອງການລັດຖະບານ ກັບບັນດາອົງການສະຫະປະຊາຊາດ ແລະຄູ່ຮ່ວມພັດທະນາອື່ນໆເພື່ອສະເຫຼີມສະຫຼອງວັນສຸຂະພາບໂລກ ຊຶ່ງຫົວຂໍ້ດັ່ງກ່າວແມ່ນມີຄວາມສຳຄັນທີ່ສຸດສໍາລັບປະຊາຊົນລາວທຸກຄົນ “ກ່າວໂດຍ ທ່ານນາງ ດຣ. ຈູລຽດ ໄຟລໂຊຄ໌ຜູ້ຕາງໜ້າອົງການອະນາໄມໂລກປະຈໍາ ສປປລາວ.

ຄວາມປອດໄພຂອງອາຫານ ແມ່ນບັນຫາທີ່ກ່ຽວຂ້ອງກັບຫລາຍພາກສ່ວນ ແລະການມີຄວາມຮັບຜິດຊອບຮ່ວມກັນ, ອົງການອະນາໄມໂລກແມ່ນຍິນດີໃນການປະກອບສ່ວນຂອງຂະແໜງການອື່ນໆທີ່ບໍ່ນອນໃນຂະແໜງການສາທາລະນະສຸກ ແລະ ຄູ່ຮ່ວມພັດທະນາ ໃນການເຂົ້າຮ່ວມຂະບວນການນີ້ ແລະ ພວກເຮົາຂໍຖືໂອກາດ ນີ້ເພື່ອຊັກຊວນບັນດາອົງການຈັດຕັ້ງຂອງລັດຖະບານ, ຜູ້ຜະລິດ, ຜູ້ຂາຍ ແລະປະຊາຊົນ ເພື່ອໃຫ້ເຂົ້າໃຈກ່ຽວກັບຄວາມສໍາຄັນຂອງຄວາມປອດໄພອາຫານ ເພື່ອຮັບປະກັນວ່າອາຫານທີ່ເສີບໃສ່ຈານໃຫ້ແກ່ຜູ້ບໍລິໂພກແມ່ນມີຄວາມປອດ.

ພະຍາດທີ່ເກີດຈາກອາຫານແມ່ນໄດ້ກາຍເປັນບັນຫາທີ່ສໍາຄັນທາງດ້ານສາທາລະນະສຸກ ແຕ່ລະປີໄດ້ມີການລະບາດທີ່ເປັນສາເຫດມາຈາກເຊື້ອພະຍາດ ເຊັ່ນ: ການປົນເປື້ອນເຊື້ອພະຍາດອາຫານ ໃນສະຫະລັດ, ໃນປະເທດຢູໂລບ, ການປົນເປື້ອນສານເມລາມິນ, ເຊື້່ອພະຍາດໃນນົມ, ສານເນື້ອແດງໃນຊີ້ນ, ສານຫ້າມໃຊ້ໃນອາຫານ ເຊັ່ນ: ບໍແລັກ, ສານຟອກຂາວ, ຟໍມາລິນ ແລະອື່ນໆ ທີ່ເປັນບັນຫາ ແລະ ກໍ່ຄວາມເສຍຫາຍໃຫ້ແກ່ປະຊາຊົນໃນທົ່ວໂລກ . ໃນສ ປປ ລາວ ໂດຍສະເພາະ ກະຊວງສາທາລະນະສຸກ ທີ່ເປັນອົງການຈັດຕັ້ງລັດທີ່ມີໜ້າທີ່ປົກປ້ອງສຸຂະພາບຂອງປະຊາຊົນ ແມ່ນໄດ້ຮ່ວມມືກັບພາກສ່ວນຕ່າງໆທີ່ກ່ຽວຂ້ອງ ໄດ້ສ້າງກົດໝາຍແລະຂໍ້ກໍານົດລະບຽບການແລະມາດຕະຖານຂອງອາຫານ ແລະ ໄດ້ເຜີຍແຜ່ໃຫ້ແກ່ ພະນັກງານລັັດ ແລະ ຜູ້ປະກອບການດ້ານອາຫານໃນທົ່ວປະເທດ. ນອກຈາກນັ້ນແມ່ນໄດ້ລົງຕິດຕາມກວດກາເກັບຄືນ ແລະ ປະຕິບັດມາດຕະຖານຕໍ່ອາຫານທີ່ມີການປົນເປື້ອນດັ່ງກ່າວ, ນອກຈາກນັ້ນຍັງໄດ້ຈັດຕັ້ງ ການຝຶກອົບຮົມໃຫ້ແກ່ຜູ້ປະກອບການອາຫານ ທີ່ຜະລິດ, ນໍາເຂົ້າ, ຈໍາໜ່າຍ, ເກັບຮັກສາ, ປຸງແຕ່ງແລະບໍລິການອາຫານ ກ່ຽວກັບຄວາມປອດໄພຂອງອາຫານ, ການຜະລິດອາຫານທີ່ດີ ແລະ ການສຸຂະນາໄມທີ່ດີຕາມ 5 ຂໍກຸນແຈອາຫານປອດໄພຂອງອົງການອະນາໄມໂລກເພື່ອຫຼຸດຜ່ອນເຫດການການປົນເປື້ອນດ້ານອາຫານ ໃຫ້ຫລຸດນ້ອຍຖອຍລົງທັງເປັນການຫລຸດຜ່ອນຄວາມເຈັບປ່ວຍຂອງປະຊາຊົນ.

ມາດຕະການທາງດ້ານສຸຂະນາໄມທີ່ເໝາະສົມຈະຕ້ອງໄດ້ນໍາໃຊ້ໃນການຈັດການກັບອາຫານ, ການເກັບຮັກສາ, ການປຸງແຕ່ງ, ຂົນສົ່ງແລະແຈກຢາຍເພື່ອຫຼີກລຽງການປົນເປື້ອນ.

ໃນເວລາດຽວກັນນັ້ນ, ລັດຖະບານ ສປປລາວ ໄດ້ມີມາດຕະການໃນການປັບປຸງຄວາມປອດໄພອາຫານຕັ້ງແຕ່ບ່ອນປູກຝັງ/ລ້ຽງສັດ, ໂຮງງານ, ສະຖານທີ່ຂາຍອາຫານ ແລະ ຜູ້ຂາຍອາຫານແຄມທາງ. ລັດຖະບານໄດ້ປັບປຸງມາດຕະຖານອາຫານ ແລະລະບຽບການໃຫ້ສອດຄ່ອງກັບອາຊຽນ (AEC) ແລະ ມາດຕະຖານສາກົນ(CODEX Alimentarius) ຄູ່ມືແລະມາດຖານການປະຕິບັດຕົວຈິງ ທີ່ແນະນໍາໂດຍອົງການອະນາໄມໂລກເພື່ອຊ່ວຍບັນດາປະເທດຕ່າງໆໃນການປ້ອງກັນ,ຊອກຫາ ແລະຕອບໂຕ້ການລະບາດຂອງພະຍາດທີ່ເກີດຈາກອາຫານ.

ມັນມີຄວາມຈໍາເປັນໃນການເຊື່ອມສານມາດຕະຖານແລະລະບຽບການຕ່າງໆເພື່ອອໍານວຍຄວາມສະດວກໃຫ້ແກ່ການຄ້າລະຫວ່າງປະເທດອາຊຽນດ້ວຍກັນ ແລະກົມອາຫານແລະຢາໄດ້ທົບທວນຄືນກ່ຽວກັບ ບົດບາດຂອງປະຊາຄົມອາຊຽນ ກ່ຽວກັບການຄໍ້າປະກັນສະບຽງອາຫານ ແລະຄວາມປອດໄພອາຫານ ເພື່ອເບິ່ງສະຖານະການຂອງອາຫານ ແລະເຊື່ອມສານກັບບັນດາລະບຽບການສາກົນ.

ມີສິ່ງທ້າທາຍຫລາຍຢ່າງໃນຕໍ່ໜ້າ ໂດຍສະເພາະບັນຫາການຄໍ້າປະກັນສະບຽງອາຫານ ແລະ ຄວາມປອດໄພຂອງອາຫານແມ່ນຍັງບໍ່ທັນໄດ້ຮັບຄວາມເອົາໃຈໃສ່ເທົ່າທີ່ຄວນຈາກພາກລັດຖະບານໃນຫລາຍປະເທດອາຊຽນ, ນອກນີ້ຍັງເຫັນວ່າຄວາມຮັບຮູ້ຂອງປະຊາຊົນກ່ຽວກັບຄວາມປອດໄພອາຫານຍັງຢູ່ໃນລະດັບຕໍ່າ,ຄວາມແຕກຕ່າງທາງດ້ານລະບຽບການຂອງບັນດາປະເທດຕ່າງໆ, ໃນທົ່ວໂລກ ເຮັດໃຫ້ການປົນເປື້ອນແຜ່ກະຈາຍຢ່າງກ້ວາງຂວາງ, ຍ້ອນການຕິດຕາມ ແລະການເຝົ້າລະວັງພະຍາດທີ່ເກີດຈາກອາຫານຍັງບໍ່ທັນເຂັ້ມແຂງພຽງພໍ, ຂາດແຄນທຶນຮອນ ແລະພື້ນຖານໂຄງລ່າງຍັງທັນພຽບພ້ອມ ຊຶ່ງໃນຂະນະດຽວກັນກໍ່ມີບັນຫາໃໝ່ຍັງສືບຕໍ່ເກີດຂຶ້ນ.

ການປ່ຽນແປງການຜະລິດ,ການແຈກຢາຍ ແລະການບໍລິໂພກ, ການປ່ຽນແປງສະພາບແວດລ້ອມ, ດິນຟ້າ ອາກາດ, ເຊື້ອພະຍາດໃໝ່ ແລະ ພິດເບື່ອ, ການດື້ຕໍ່ຢາ ແລະບັນຫາກ່ຽວກັບຄວາມສ່ຽງຂອງອາຫານ ໄດ້ເພີ້ມຂຶ້ນຊຶ່ງເຮັດໃຫ້ອາຫານມີການປົນເປື້ອນຫລາຍຂື້ນ.

ການສະເຫຼີມສະຫຼອງວັນສຸຂະພາບໂລກໃນປີນີ້ ມີຈຸດປະສົງເພື່ອຈະສົ່ງເສີ່ມດ້ານຄວາມປອດໄພຂອງອາຫານ ຜ່ານກິດຈະກຳແບບຄອບຄົວ ເພື່ອສົ່ງເສີ່ມໃຫ້ເດັກນ້ອຍມີຄວາມຮູ້ກ່ຽວກັບອາຫານທີ່ດີຕໍ່ສຸຂະພາບ, ພໍ່ແມ່ມີຄວາມເຂົ້າໃຈກ່ຽວກັບຄວາມປອດໄພຂອງອາຫານ ແລະ ເພື່ອເຮັດໃຫ້ຄູ່ຮ່ວມພັດທະນາ ແລະ ກະຊວງອື່ນໆ ປະຕິບັດວຽກງານດັ່ງກ່າວໃຫ້ເຂັ້ມງວດ ເພື່ອປັບປຸງຄວາມປອດໄພອາຫານທຸກຈານທີ່ຈະບໍລິໂພກ.

ທ່ານ ສາດສະດາຈານ ດຣ. ເອກສະຫວ່າງ ວົງວິຈິດໄດ້ກ່າວວ່າ “ພະຍາດທີ່ເກີດຈາກອາຫານແມ່ນໄດ້ກະທົບເຖິງການພັດທະນາທາງດ້ານເສດຖະກິດ-ສັງຄົມ, ຊຶ່ງເປັນຕົວຖ່ວງດຶງວຽກງານຮັກສາສຸຂະພາບ ເຊັ່ນພະຍາດຖອກທ້ອງຍັງເປັນພະຍາດໜຶ່ງ ໃນ 5 ພະຍາດ ທີ່ເປັນສາຍເຫດຂອງການເສຍຊີວິດ ໃນເດັກນ້ອຍຕໍ່າກ່ວາ 5 ປີ ໃນປະເທດເຮົາ. ບັນຫາຄວາມປອດໄພອາຫານ, ໂພຊະນາການ ແລະການຕາຍຂອງເດັກນ້ອຍແມ່ນເປັນບັນຫາທີ່ເຊື່ອມໂຍງກັນ”