 ສ້າງຄວາມເຂັ້ມແຂງວຽກງານຕິດຕາມຜົນສະທ້ອນຈາກການນໍາໃຊ້ຢາ
ບົດຂ່າວໂດຍ: ດຣ. ນາງ ສຸລິວັນ ແກ້ວກິນາລີ
ຮອງຫົວໜ້າພະແນກຄຸ້ມຄອງການຢາໂຮງໝໍ
ການຕິດຕາມຄວາມປອດໄພຂອງຢາພາຍຫລັງອະນຸຍາດໃຫ້ຈໍາໜ່າຍ ແມ່ນວຽກງານຫນຶ່ງທີ່ສໍາຄັນ ແລະ ຈໍາເປັນໃນການຮັບປະກັນຄຸນນະພາບ, ຄວາມປອດໄພ ແລະ ປະສິດທິພາບຂອງຜະລິດຕະພັນຢາ ທີ່ປິ່ນປົວ ຊຶ່ງຈຸດປະສົງແມ່ນເພື່ອຫລຸດຜ່ອນຄວາມອັນຕະຈາກຜົນຂ້າງຄຽງຂອງຢາໂດຍກໍານົດ ແລະ ການຄຸ້ມຄອງຄວາມສ່ຽງຜ່ານກົນໄກການຄົ້ນຫາ, ການປະເມີນ ແລະ ການຕິດຕາມຄວາມປອດໄພຂອງຜະລິດຕະພັນຢາ ນອກຈາກນີ້ ການຕິດຄາມຄວາມປອດໄພຂອງຢາ ຍັງສົ່ງເສີມສ້າງຄວາມເຂົ້າໃຈກ່ຽວກັບເພຊັດວິທະຍາ ແລະ ຄຸນລັກສະນະຜິດເບຶ່ອຂອງຢາ ເພື່ອເຮັດໃຫ້ການນໍາໃຊ້ຢາມີປະສິດທິພາບ ແລະ ປອດໄພ.
ສະນັ້ນເພື່ອສ້າງຄວາມເຂັ້ມແຂງໃນວຽກງານດັ່ງກ່າວ ກົມອາຫານ ແລະ ຢາ ໃນນາມອົງການຄຸ້ມຄອງລັດ ດ້ານວຽກງານຄຸ້ມຄອງຄວາມປອດໄພອາຫານ, ຢາ ແລະ ຜະລິດຕະພັນການແພດ ຂອງກະຊວງສາທາລະນະສຸກ ໂດຍສະເພາະດ້ານວຽກງານຄຸ້ມຄອງຄວາມປອດໄພດ້ານຢາ ໄດ້ຮ່ວມມືກັບ ສູນເປັນເລີດດ້ານການຄຸ້ມຄອງ ປະເທດ ສິງກາໂປ(Centre of Regulatory Excellence) ແລະ ມະຫາວິທະຍາໄລ Duke-NUS Medical School ໄດ້ຈັດອົບຮົມກ່ຽວກັບການຕິດຕາມຄວາມປອດໄພຂອງຢາຂຶ້ນທີ່ ໂຮງແຮມ ເສດຖາ ປຮາເລດ ໃນລະຫວ່າງວັນທີ 7-8 ສິງຫາ 2017 ໂດຍການເປັນປະທານຂອງ ທ່ານ ດຣ. ບຸນຊູ ແກ້ວຫາວົງ ຮອງຫົວໜ້າກົມອາຫານ ແລະ ຢາ ແລະ ທ່ານ ຮສຈ ດຣ. Leong Wai Yeen James ແລະ ມີວິຊການທີ່ຮັບຜິດຊອບວຽກຕິດຕາມຄວາມປອດໄພຂອງຢາມາຈາກ ກົມປິ່ນປົວ, ກົມອາຫານ ແລະຢາ, ສູນຄວບຄຸມວັນນະໂລກ, ສູນຕ້ານເອດ ແລະ ພຕພ, ສູນໄຂ້ຍຸງ ແມ່ກາຟາກ ແລະ ແມງໄມ້, ຜູ້ເຂົ້າຮ່ວມຈາກ 3ໂຮງໝໍສູນກາງ ແລະ 3 ໂຮງໝໍແຂວງ ເປັນຕົ້ນ ໂຮງໝໍມະໂຫສົດ, ເສດຖາທິລາດ, ມິດຕະພາບມ ແຂວງຄໍາມ່ວນ, ສະຫວັນນະເຂດ ແລະ ຈໍາປາສັກວິທະຍາກອນແມ່ນມາຈາກ Health Sciences Authority Singapore, Uppsala Monitoring Centre ແລະ Bayer South East Asia, Singapore.
ຈຸດປະສົງຂອງການອົບຮົມແມ່ນເພື່ອ: 1)ໃຫ້ຜູ້ເຂົ້າຮ່ວມຮັບຮູ້, ເຂົ້າໃຈ ແລະ ອະທິບາຍໄດ້ເຖິງຜົນປະໂຫຍດ ກິດຈະກໍາການຕິດຕາມຄວາມປອດໄພຂອງຢາຫລັງການຈໍາໜ່າຍຕໍ່ຜູ້ຄົນສ່ວນບຸກຄົນ ແລະ ປົກປັກຮັກສາສຸຂະພາບຂອງປະຊາຊົນ, ລວມທັງການສຶກສາກ່ຽວກັບການນໍາໃຊ້ຢາທີ່ດີທີ່ສຸດ ແລະ ການລາຍງານກ່ຽວກັບເຫດການທີ່ບໍ່ເພິ່ງປາດຖະໜາ (AE). 2)ແນະນໍາແນວຄວາມຄິດເພື່ອປັບປຸງຂະບວນການລາຍງານເຫດການທີ່ບໍ່ເພິ່ງປາດຖະໜາຂອງຢາ ແລະ ການສຶກສາ ເພື່ອຫຼຸດຜ່ອນຄວາມສ່ຽງ (ເຊັ່ນ: ການອອກແບບການເຮັດວຽກທີ່ດີທີ່ສຸດສໍາລັບການເກັບກໍາຂໍ້ມູນ ແລະ ການວິເຄາະຂໍ້ມູນ, ການປັບປຸງການສື່ສານລະຫວ່າງຂັ້ນແຂວງ ແລະ ຂັ້ນສູນກາງ ໂດຍອີງໃສ່ຊັບພະຍາກອນທີ່ມີຢູ່).
3)ສະເຫນີຍຸດທະສາດເພື່ອກະຕຸກຊຸກຍູ້ໃຫ້ມີການລາຍງານເຫດການບໍ່ເພິ່ງປາດຖະໜາຫລາຍຂື້ນ (ເຊັ່ນ: ວິທີການອໍານວຍຄວາມສະດວກໃນການປະຕິບັດຄູ່ມືໃນການລາຍງານເຫດການທີ່ບໍ່ເພິ່ງປາດຖະໜາ) ແລະ 4)ຍົກໃຫ້ເຫັນຄວາມສໍາຄັນໃນການຄຸ້ມຄອງຄວາມສ່ຽງ ແລະ ການຫຼຸດຜ່ອນຄວາມສ່ຽງ ແມ່ນກິດຈະກໍາສໍາຄັນພາຍຫລັງອະນຸຍາດຈໍາໜ່າຍ.
ການດໍາເນີນກອງປະຊຸມ: ແມ່ນຮັບຟັງການນໍາສະເໜ ແລະ ແບ່ງກຸ່ມຄົ້ນຄ້ວາ ຜົນໄດ້ຮັບຂອງກອງປະຊຸມ: ສໍາມານາກ່ອນມີຄວາມເຂົ້າໃຈແຈ້ງກ່ຽວກັບ:
- ຄວາມສໍາຄັນຂອງກິດຈະກໍາຕິດຕາມຄວາມປອດໄພຂອງຢາພາຍຫລັງການຈໍາໜ່າຍ ເພື່ອຊຸກຍູ້ ແລະ ສົ່ງເສີມໃຫ້ພາກສ່ວນທີ່ກ່ຽວຂ້ອງມີຄວາມສົນໃນປະກອບສ່ວນ ລວມທັງພະນັກງານສາທາລະນະສຸກ ແລະ ຜູ້ກໍານົດນະໂຍບາຍ
- ສາມາດກໍານົດ ແລະ ພັດທະນາແຜນການຮ່ວມມືກັບພາກສ່ວນທີ່ມີສ່ວນກ່ຽວຂ້ອງ
- ສະເໜີແນວຄວາມຄິດ ເພື່ອປັບປຸງລະບົບການລາຍງານ ແລະ ຄວາມຮູ້ໃນການລຸດຜ່ອນຄວາມສ່ຽງ
- ແນະນໍາແນວຄວາມຄິດເພື່ອປັບປຸງຂະບວນການສໍາລັບການລາຍງານເຫດການທີ່ບໍ່ເພິງປາດຖະໜາ ແລະ ສຶກສາດ້ານການຫຼຸດຜ່ອນຄວາມສ່ຽງ
ວຽກງານຕິດຕາມຜົນສະທ້ອນຈາກການນໍາໃຊ້ຢາ ແມ່ນໄດ້ຮັບການຈັດຕັ້ງປະຕິບັດຄືບໜ້າ ພາຍຫຼັງວຽກງານດັ່ງກ່າວ ໄດ້ເລີ່ມຈັດຕັ້ງປະຕິບັດແຕ່ປີ 2013 ແລະ ໄດ້ຮັບເຂົ້າເປັນສະມາຊິກສົມບູນ ວັນທີ 8 ກໍລະກົດ 2015 ກ່ຽວກັບການຕິດຕາມຄວາມປອດໄພຂອງຢາ ເຊິ່ງເປັນປະເທດສະມາຊິກອັນດັບທີ 122.
| 
